Xa está na rúa o nº 107 da revista Papeles de Relaciones Ecosociales y Cambio Global editado pola FUHEM. O tema central é a sabedoría ecolóxica das comunidades. Reivindicar este saber nestes momentos de crise ecosocial supón pór en primeiro plano a relación que certas comunidades estableceron coa súa contorna natural, nun marco de respecto e de adaptación ao medio que, á súa vez, foi configurando un legado cultural que constitúe a memoria da especie humana. A revista aborda no seu Especial estas tradicións milenarias analisando, entre outros aspectos, o seu potencial no mantemento da diversidade biolóxica e o manexo sustentable dos recursos; á vez que se identifican as principais ameazas que se cernen sobre elas. Xunto ás habituais seccións de Panorama, Periscopio e Libros, cómpre salientar tamén neste número un ensaio sobre a racionalidade da economía capitalista e unha entrevista a Serge Latouche, ideólogo do decrecimiento.

Este é o tema central do nº 151 da Revista Tempos Novos. Entre outros artigos recolle unha longa entrevista con Carlos Taibo, un dos meirandes valedores da teoría do decrecemento no Estado español, e unha crónica de distintas iniciativas desenvolvidas en Galiza no camiño ao decrecemento dende unha perspectiva persoal, na vida cotián, e das dificuldades e atrancos atopados.

Unha boa forma de iniciar un achegamento aos fundamentos do decrecemento, termo e praxe que sen dúbida acolle o xermolo dunha verdadeira transformación das nosas sociedades no camiño da sustentabilidade ecolóxica.