Publicado en español por Los Libros de la Catarata  e dirixido por Carlos Taibo, unha das referencias da opción do decrecemento no Estado español que, asemade, achega no limiar dez observacións imprescindíbeis sobre o que nos di o devandito proxecto. A obra achega unha ducia de artigos orixinais sobre a incidencia práctica que tería a escolla do decrecemento en diferentes aspectos das sociedades e do planeta.

Como indica o seu director: “Hoxe en día dispomos dunha teoría xeral sobre o decrecemento que foi adquirindo cada vez máis forza. Para completar este proxecto, con todo, urxe trasladar os conceptos teóricos xerais a ámbitos máis concretos. Isto é precisamente o que propoñen os autores: unha reflexión sobre o que debería cambiarse na vida cotiá a través do estudo de doce terreos relevantes do decrecemento: o medio urbano e o medio rural, as mulleres e as migracións, a sanidade e a educación, o mundo sindical e o lecer, o transporte e os medios de comunicación, os indicadores económicos e os países do Sur”.

Deste xeito, a obra achega unha visión do decrecemento bastante novidosa e pouco tratada até agora na literatura máis copiosa do tema, a das escolas francesa e italiana e que, sen ser aínda exhaustiva e moi concreta nalgúns casos, quere dar un primeiro paso na aplicación e consecuencias prácticas que tería a escolla do decrecemento nas nosas opulentas sociedades norteñas.

Ver a nova completa en Altermundo

Xa está na rúa o nº64 da revista Ecologista editada por Ecologistas en Acción. O tema central neste número é o decrecemento a través dun conxunto de artigos agrupados baixo o título "Menos para vivir mejor: Poniendo en práctica el decrecimiento". Entre outras, Yayo Herrero incita a unha reflexíon sobre a necesidade de decrecemento, Julia Weingärtner e Marta Monasterio desenvolven as relacións entre ecofeminismo e decrecemento coa xustaposición entre empleo e traballo dende unha perspectiva de xénero, Javier Zarzuela explora o movemento de transición e os transition towns e Daniel López y Mireia Llorente achéganse ao decrecemento dende unha ollada agroecolóxica.

Vén de se publicar o número sete da revista Cos Pés na Terra , unha revista electrónica para a información, a reflexión e o debate sobre o medio ambiente e a sustentabilidade. Inclúe a crónica dunha conferencia de Carlos Taibo sobre decrecemento e artigos verbo do impacto dos parques eólicos na Rede Natura en Galiza, o panorama enerxético galego, a crise alimentar, o Plano de Acción para deter a perda de biodiversidade na UE e o activismo NYMBI. Activistas e expertos oferecen na sección debate a súa visión sobre o desafío que supón a mudanza climática para Galiza. O número complétase coa publicación dun manifesto ecoloxista galego de 1981 até agora inédito na rede e con varias reseñas de libros e revistas.

Xa está na rúa o nº 107 da revista Papeles de Relaciones Ecosociales y Cambio Global editado pola FUHEM. O tema central é a sabedoría ecolóxica das comunidades. Reivindicar este saber nestes momentos de crise ecosocial supón pór en primeiro plano a relación que certas comunidades estableceron coa súa contorna natural, nun marco de respecto e de adaptación ao medio que, á súa vez, foi configurando un legado cultural que constitúe a memoria da especie humana. A revista aborda no seu Especial estas tradicións milenarias analisando, entre outros aspectos, o seu potencial no mantemento da diversidade biolóxica e o manexo sustentable dos recursos; á vez que se identifican as principais ameazas que se cernen sobre elas. Xunto ás habituais seccións de Panorama, Periscopio e Libros, cómpre salientar tamén neste número un ensaio sobre a racionalidade da economía capitalista e unha entrevista a Serge Latouche, ideólogo do decrecimiento.