Consomes ou Devoras? Consumo responsábel, xusto e ecolóxico

Publicado o número 5 de Cos Pés na Terra

Xa se pode ler o número 5 da revista electrónica Cos Pés na Terra . Inclúe unha crónica do II Congreso de Agroecoloxía  de Galicia e artigos sobre o canon hidroeléctrico, a reserva pesqueira de Lira, a impunidade das transnacionais, o impacto socioambiental de Calvo no Salvador, o desafío inaprazable da mudanza climática, os prexuízos sanitarios da contaminación atmosférica, o ecopacifismo e o pensamento de Manuel Sacristán. A persoa entrevistada  é Pedro Brufao, especialista en dereito ambiental que formou parte da comisión promotora da iniciativa lexislativa popular en defensa dos ríos galegos. O editorial aborda a relación entre enerxías renovables e territorio, asunto que o concurso eólico trouxo ao primeiro plano. Alén da revista, o consello de redacción de Cos Pés na Terra mantén un blog .

Guía para o consumo responsábel de roupa - CRL

A campaña Roupa Limpa, impulsada por Setem no Estado español e por Amarante en Galiza, ten unha Guía de Consumo Responsábel de Roupa descarregábel en formato .pdf. A guía, que ademais de consellos ofrece unha valoración xeral das principais empresas do téxtil, ten como eixos os direitos humanos e o ambiente.        

Revista Opcións

O obxectivo principal da revista Opcions, editada polo CRIC, é ofrecer unha ferramenta útil para a práctica do consumo consciente (consumo responsable). Emprega unha linguaxe clara que se poida entender sen necesidade de coñecementos previos. O Centre de Recerca i Informació en Consum (Centro de Investigación e Información en Consumo, CRIC) é unha asociación cidadá sen ánimo de lucro. Naceu, en 1996, dunhas cantas persoas que se preguntaban se as repercusións do seu consumo podían ser contraditorias coas súas ideas. Publicaron catro libros e fixeron numerosas charlas sobre consumo responsable. Actualmente a súa actividade céntrase na edición da revista Opcions e en dar charlas e cursos. Accede aos seus contidos

Guía de consumo responsábel de peixe

Greenpeace-España ten unha Guía de Consumo Responsábel de Peixe que complementa con información sobre Mercados Pesqueiros. A Guía de Consumo aborda a etiquetaxe, recolle dados sobre as especies máis consumidas, achega informes e propón cinco criterios para o consumo responsábel de peixe: aproveitalo ben, rexeitar inmaduros, priorizar o máis achegado,  optar polos métodos selectivos de pesca e escoller selvaxe frente a acuicultura. A sección web sobre Mercados Pesqueiros inclúe unha Lista Vermella de Especies Pesqueiras (tamén descarregábel), información sobre especies e técnicas pesqueiras, consellos para distribuidores e unha avaliación das políticas de compra dos principais destes.

Guía de alimentos transxénicos

Greenpeace publica a súa guía sobre productos que conteñen ou non transxénicos no que se ten convertido nunha referencia á hora de facer un consumo responsábel. Os cultivos transxénicos utilizados para alimentación humana na UE son fundamentalmente algunhas variedades de millo e de soia. Por iso nesta guía figuran sólamente alimentos que conteñan polo menos un ingrediente ou aditivo producido a partir destes cultivos. Algúns exemplos de ingredientes e aditivos derivados do millo e da soia, e xa que logo "sospeitosos" de ter unha orixe transxénica, son: * Soia: fariña, proteína, aceites e graxas (a miúdo escóndense" detrás da denominación aceites/graxas vexetais), emulgentes (lecitina-E322), mono e diglicéridos de ácidos grasos (E471), acedos grasos. * Millo: fariña, almidón*, aceite, sémola, glicosa, jarabe de glicosa, fructosa, dextrosa, maltodextrina, isomaltosa, sorbitol (E420), caramelo (E150), grits. ("Almidón modificado" fai referencia a unha transformación físico-química sen relación cos transxénicos.) Accede á guía dende a web de Greenpeace

A calidade do aire en Galicia: Balanzo 2007

A Dirección Xeral de Calidade e Avaliación Ambiental continúa a incumprir as disposicións sobre información ao público contidas na normativa de calidade do aire, negándolle á cidadanía o dereito a unha información suficiente, clara e rápida. De persistir esta situación, Verdegaia e Ecologistas en Acción presentarán unha queixa perante o Valedor do Pobo. Ademais, hai indicios dabondo de que desde a Consellería de Medio Ambiente se procuran ocultar as superacións dos valores límite de concentración de contaminantes no aire estabelecidos na lexislación, trasladando ou deixando fóra de servizo estacións de medición da calidade do aire, non garantindo o seu bo funcionamento ou ocultando información sobre os parámetros medidos. Por exemplo, no informe oficial sobre a calidade do aire en 2007 non se inclúe información para os parámetros e as estacións de medición nas que se rexistraron superacións dos valores límite legais en 2006, sobre as que Verdegaia e Ecologistas en Acción chamaron a atención no seu día. Incluso dúas estacións nas que se detectaron superacións dos valores límite en 2006 foron eliminadas ("Campo de fútbol", no contorno de FINSA en Santiago, e "Escola Naval", no contorno ENCE, en Marín), mentres que outra foi trasladada (a estación urbana da cidade de Santiago). Aire contaminado en cidades e contornos industriais A calidade do aire en Galicia non se pode considerar moi boa, como se asegura desde a Xunta. Mesmo coa limitada información dispoñible, pódese afirmar que os habitantes das cidades galegas e do contorno dalgunhas industrias, como ALCOA-San Cibrao, ENCE ou FINSA, están expostos a níveis de contaminación atmosférica nocivos para a saúde. Aínda que en 2007 só se rexistrou unha superación dun valor límite legal (para dióxido de nitróxeno, NO2, en Santiago), en todas as sete principais cidades superáronse os valores de partículas inferiores a dez micras (PM10) -o contaminante máis preocupante para a saúde humana- recomendados pola Organización Mundial da Saúde. Ademais, en Ferrol, A Coruña, Santiago e Vigo tamén se superou o valor medio anual de NO2 que estará legalmente en vigor en 2010. A Xunta e os Concellos das principais cidades seguen sen preocuparse pola deterioración da calidade do aire. Verdegaia e Ecologistas en Acción demandan a mellora da rede galega para a vixilancia da calidade do aire, o cumprimento estrito da lexislación sobre acceso á información e a adopción de planos para a mellora da calidade do aire en cidades e contornos industrais. Neste sentido é fundamental a aplicación nas cidades e as súas áreas de influencia de Planos de Mobilidade Sustentable que disuadan o uso do coche e fomenten a marcha a pé, a bicicleta e o transporte público colectivo.   O informe "A calidade do aire en Galicia. Balanzo 2007" pretende debuxar unha imaxe da situación da calidade do aire en Galicia durante o ano 2007. Baséase nos datos oficiais ofrecidos pola Consellería de Medio Ambiente a través da súa web. Complementa o informe "La calidad del aire en el Estado español.Balance 2007" de Ecologistas en Acción, que non recolle datos sobre Galicia, pois a Xunta foi o único goberno autonómico que non forneceu a tempo ningún tipo de información para a realización dese informe.